يا جمل كركر(شعر)

يا صاحبي قوم واتخبر

وسأل على بنت مأسورة

بالأمس كان اسمها البندر

والأن ممسوخة الصورة

فيها الروافل بتتمخطر

واشباح بتسد ماصورة

كانت جميلة في المنظر

بالرزق والخير موفورة

تمسي بمأمن ولا تُقهر

والناس بالعيش مسرورة

واليوم جاها الزمن لغبر

وجاءت أوجاه منكوره

لا عاد كهرب بها تذكر

كلن يشغل لماطوره

رثيثة الحال والمنظر

من بعد ما كانت اسطورة

الجو خانق بها ينذر

أعصار قادم بعاكوره

كركر جمل يا جمل كركر

من يسمع أقوال منثوره

هذا بيده صميل أخضر

وذاك باليد باكورة

هذا بيحفر وذا يطمر

وذاك يحمي لتنوره

هذا بهذاك يبي يغدر

يمكنه ضرب بالخورة

وذاك غدار يبي يمكر

يحط هذا بحافورة

والمشكلة كلهم عسكر

وابتال مع ناس طرطوره

يا قهر عبلة على عنتر

وابطال بالقبر مقبوره

ما عاد تلبس ذهب أصفر

ولا عاد بودر وحامورة

كركر جمل يا جمل كركر

شرحت واقع من الصورة

من ينقذش يا حلا سكر

من ذر بالأرض مذرورة

من ذي يبشر وقول ابشر

من يبعد الشر ودافوره

با طلعه فوق بالمنبر

والشعب والناس جمهوره

أمير يطلع ويتأمر

بازوجه بنت أمورة

ختمتها بالنبي لزهر

ما تصبح الأرض ممطورة