الشعب المنطوح

تخيل عملتنا انهارت الى ادنى مستوى واصبحت لاقيمة لها . وراتبك مايجي قيمة قلس شاهي .. 
ويصل بنا الحال الى حد المجاعة . وتقرر تعتكف بين اسرتك في البيت الى حد الموت. ولحسن حضك ان الحر شديد ومافيش كهرباء. يعني حر وجوع بيكون موتكم سريع ..

وبعد خمسة يوم تجي جارتكم تدق باب بيتك عشان تستلف راس بصل من زوجتك وماحد يرد عليها. واثنا ماهي واقفة على الباب تشم ريحة جثثكم..
تروح تخبر باقي الجيران ويكسرون الباب ويلاقونك ميت انت واسرتك..
يقومون بالواجب. يدفنوكم في اقرب مقبرة وبعد يومين فقط يجون بلاطجة من بلاطجة الاراضي ويبسطون على المقبرة . ويجيبون شيول .يجرفوا جثثكم ويرمونها في برميل زبالة.. وبقدرة قادر يجي ثور بلا ادب وينطح برميل الزبالة وتنكب جثثكم  على الارض بجانب البرميل. يجون عمال البلدية عشان يحملون الزبالة يلاقون البرميل فاضي ويتركون جثثكم مرمية.. ومع مرور الزمن تتحلل جثثكم  وتجي شركة تنقيب عن النفط وتكتشف حقل نفطي في الموقع اللي تحللت فيه جثثكم. ويتم استخراج النفط  ومشتقاتة.  
جثتك تروح قسم صناعة التايرات وتتحول الى تاير من النوعية الرديئة وجثث عيالك تتحول الى ديزل مغشوش.. 
يجي مسؤل ويشتريك تاير لسيارتة .واول مايطلع من البنشر يضرب في رصيف وتنفجر.. يرميك في الشارع ويشتري تاير اخر .
واثنا ما انت مرمي في الشارع تقوم مظاهره شعبية ضد الحكومة ويحرقوك مع عشرين تاير اخر.. وبعد ماتخلص المظاهرة يجي عمال النظافة يشلوك رماد ويرموك وسط برميل الزبالة وبعد شوي بجي نفس الثور قليل الادب اللي نطح البرميل وفيه جثتك . ويقرر نطح البرميل واول مايرجع للوراء عشان يستعد للنطح تطلع انت من وسط البرميل وتقول له يا اخي ارحم امي انا قررت اموت عشان ارتاح  من الفقر والمرمطة وانت تارك كل الفاسدين والسرق والبلاطجة وجاي تنطحني حتى وانا رماد.. 

✍️مهدي المحفدي